Sevdiğim cânım yolunda hâke yeksân olduğum
Iyddır çık naz ile seyrâna kurban olduğum
Ey benim aşkında bülbül gibi nâlân olduğum
Iyddır çık naz ile seyrâna kurban olduğum
Cümle yârân sana uşşâk olduğun bilmez misin
Cümlenin tâkatleri tâk olduğun bilmez misin
Şimdi âlem sana müştâk olduğun bilmez misin
Iyddır çık naz ile seyrâna kurban olduğum
Gâhî Feyz-âbâd’a doğru azmedip eyle safâ
Âsaf-âbâd’a gelip gâhî salın ey meh-likâ
Gel hele gör sahn-ı Sa’d-âbâd’a hiç olmaz bahâ
Iyddır çık naz ile seyrâna kurban olduğum
Kapladup gül-penbe şâli ferve-i semmûruna
Ol siyeh zülfü döküp ol sîne-i billûruna
Itr-ı şâhîler sürüp ol gerden-i kâfûruna
Iyddır çık naz ile seyrâna kurban olduğum
Sen açıl gül gibi zâr ile hezâr olsun Nedîm
Bend bend olsun ham-ı zülfün şikâr olsun Nedîm
Sen salın cânâ yolunda hâksâr olsun Nedîm
Iyddır çık naz ile seyrâna kurban olduğum
NEDİM
